黃韻詩的師父，肯定是余麗珍。

最近看新聞，不少張徹的舊作都被重拍《刺馬》、《五毒》，很奇怪，不管閣下看從前甚麼「粵語殘片」，都像一齣齣Cult-Film，背景、道具、對白、走位、甚至演技，極盡Cult-Film之能事，余麗珍更是Cult中之Cult，你以為仙姐那一聲粵曲腔的呀！很Campy？還看余麗珍，你便知甚麼是Camp霸。

苑瓊丹一直仙任合一，從《男親女愛》的梅日仙到《同事三分親》的洪蔘，但一直Camp不出名堂，只像個梳騎頭裝的TB。

實在，仙姐任姐並不Campy，真正Camp到入心是余麗珍，黃韻詩不過是將東宮（余麗珍）和西宮（李香珍）二合為一，又Camp又潑辣，代表作當然是甘生一系列電視劇和玫瑰系列電影。

真神怪，珍姐不少電影都神怪到極，神怪武俠、神怪戲曲，無頭系列看過嗎？無頭東宮不但生太子，還要救太子，最後還要飛頭雷電鬥飛龍！？

Camp絕之作，可算是《七彩寶蓮燈》，依稀記得汪阿姐還翻拍過《寶蓮燈》，扮過金色造形的華山聖母，但論好看，當然不及余麗珍。

《七彩寶蓮燈》，余麗珍由頭帶到尾，一人分飾兩角，所謂神又係佢鬼又係佢，大婆二奶都係佢，最神怪還不是那些巨型寶蓮燈籠，和假到出汁的吼天犬，而是珍姐的演技。

珍姐可以對著鏡頭叫痛，「啊、啊、啊。」啊足兩分鐘，但那個二號表情，像襟電掣般襟出來，最神怪還是生了一個牛高馬大的沉香，放兩個蝦子麵上頭扮髻的造型，劈山救母更兒戲到不能相信，求其擲個斧頭到假山，爆出一個華山聖母……

《七彩寶蓮燈》是七日仙嗎？無從稽考，據聞大部份珍姐電影，都是他丈夫李少芸編劇，神怪到某個程度獨門獨派，而且大收旺場。

珍姐68年退出影壇，移居加拿大，直至03年大去，其間也沒有出來走動，甚為低調，神怪旦后便由黃韻詩獨領風騷。

的確，人生非常悶，好端端一齣戲曲，一板一眼唱到底，悶死人，反而荒腔走板打亂章才叫過癮，神神化化過日辰，有時也蠻有趣。

如果你貌不驚人，又不夠西宮李香琴美艷，不妨神怪一點，含辛如苦湊大兩個蘇蝦，也有苦盡甘來一日。